Tuesday, April 4, 2017

فى عيد الأم....نفسى آخد شاور


سؤال إتسألناه كتير و احنا صغيرين
( نفسك تطلع أيه ) ؟؟؟؟
كان ردي دايماً رسامة أو مهندسة ، كبرت و تخصصت في حاجة تانية خالص ملهاش علاقة بأحلام الطفولة .
كبرت حبة كمان و بقيت أم و أكتشفت صعوبة الحياة و أكتشفت أني لازم أحقق أحلام ناس تانية و أعيش عشان أطفال طولهم 4 و 5 سم .
يعني أيه ؟ ... طب أنا فين ؟ ... طب الرسم ؟ ... طب الهندسة ؟ ... و بدأت هنا أتخلى عن أول أحلام رسمتها لنفسي و أنا طولي متر و معاها أتغيرت حاجات كتير و بدأت أحلامي كمان تتغير و الحاجات اللي بتفرحني تتغير ، بقيت أنبسط بخروجة بدل الهدية  و أحب أشتري لبس بدل ما أجيب حاجة حلوة و الحياة بدأت تقولي أن التغيير هو الشيء الوحيد الثابت في الحياة ما إقتنعتش قوي هزيتلها راسي ( بإيحاءة الموافقة ) لكن جوايا لاٌ لسة ما إقتنعتش ، أكيد مش كده .
و أتجوزت و أكتشفت إن الفستان الأبيض و الأتنين اللي زي الفراشات بردو حاجة وقتية و بتاخد وقتها و تعدي ، يعني إيه محدش بعد سنة جواز هيستناني أطل بالأبيض زي ما كانت القاعة كلها واقفة على رجل مستنية حضوري البهي ؟؟؟ .
و رن جرس بيفكرني بحاجة أتقالتلي زمان : إن التغيير هو الشيء الوحيد الثابت في الحياة ! و بلعت ريقي بالعافية و كأني ببص بتحدي فظيع للمبدأ و ما زال جوايا عند و رفض و كبرياء إن ده يمكن على تانييب لكن مش علي أنا ، و تابعت معاها تغيير الحاجات التانية اللي بتفرحني فبدل اللبس بقى السفر و بدل الخروجة بقيت لمة كابلز بنحبهم في البيت .
و خدتني الدنيا فجأة و تعبت من الفاجأة على رأي الأغنية الشهيرة
طب How about me ? ، و أتلغت بقى لفترة محترمة كلمة Me  دي و بقيت الحياة و الأفكار و الأحلام و كل حاجة بتتمحور على شخص صغير Helpless لدرجة إنه بيعيط و هو مش عارف هو عايز أيه و نفسه أفهمه أو بيعيط عشان نفسه ينام و الموضوع تحدي بالنسبة له غير حالنا خالص أننا بنقرر ننام لما نكون عايزين ننام مش كيمياء يعني .
وقتها بقى مش الجرس رن في وداني الحياة جت رزعت على الباب تقولي التغيير هو الحاجة الوحيدة الثابتة ، و كانت بتزعق جامد ، بصتلها و أنا مفتحة عيني كويس و قلت أوكي من تحت ضروسي طبعاً و عينيّ مليانة تحدي بردو .
و جه الطفل التاني و الدرس كمل في التثبيت فأصبحت كل الأحلام بتاعت زمان أحلام من أول و جديد ..... !
نفسي حد يجيبلي حاجة حلوة و خايفة أتخن ، و نفسي أخرج و مش عارفة أسيب الأولاد فين ، و نفسي أصحابنا ييجوا بس ما بنعرفش نقول كلمتين على بعض ، و نفسي أجيب لبس و الشوبينج بيهم مستحيل ، ده غير إن مقاسي بقى مش موجود !!
و نفسي أسافر و اللي جرب السفر بالأولاد ييجي يتكلم في الجزء ده مكاني عشان هقلب سلبية فظيعة .
و طبعاً من زارتني و فتحتلها الباب بعد التخبيط : الحياة بتقولي التغيير هو الثابت الوحيد في الحياة و هي بتديني بالقلم على وشي .
القلم فوقني و صحاني كده و أقنعني بالكلام ده ، قولتلها أتفضلي في الليفينج و معلش الدنيا مبهدلة عشان العيال و خلينا مع بعض حنينين و أعترفتلها بكبريائي و تعندي لفكرتي إني مش بحب التغيير الكثير و أعترفتلها كمان إني من فترة مقتنعة بس مش عايزة أعترف و إن بداية الإقتناع ده حصلت لما سألت نفسي مؤخراً إيه اللي بيفرحني و لقيت إجابات زي :
·        لما ماما تبعت الغدا .
·        لما الأولاد ياكلوا كويس .
·        لما يكون أبني هياخد مصروف و مش هحضر Lunchbox .
·        لما أنام 6 ساعات متواصل .
·        لما أشرب قهوة سخنة .
·        لما أكمل يوم بدون ما أزعق .
و اخرهم اللي خلتني زعلانة قوي على حالنا و في إحساس مستمر إن أكسب القضية دي إن الأمومة أصعب و أكثر المهمات تحدي في العالم هي إني :


نفسي أخد شاور .

No comments:

Post a Comment